2. Даналыққа бет бұрғанның
жарылқануы

1 Балам, егер сен сөздерімді қабылдасаң,
Һәм жадыңда өсиеттерімді сақтасаң,
2 Құлағың даналыққа лайым түрік болса,
Жан дүниең парасатқа дайын тұрса,
3 Егер білім мен парасатты шақырсаң,
4 Көмілген күміс пен қазынадай іздесең,
5 Сонда Жаратқанды қастерлеуді ұғарсың,
Құдай жайлы білімді иемденіп аларсың.
6 Себебі Жаратқан Ие даналық сыйлар,
Білім мен түсінік Оның аузынан шығар.
7 Әділдерге Ол ақыл-парасат сақтап қояр,
Кінәратсыз жүргендерді қалқандай қорғар.
8 Ақиқат жолын Тәңір назарында ұстар,
Өзіне бағышталғанның жолын аман сақтар.
9 Осылай әділ, тура, ақ дегеннің мәнін ұғарсың,
Ізгі жолдың қайсы екенін таба аларсың.
10 Себебі даналық жан дүниеңе енер,
Білім де жаныңды қуанышқа кенелтер,
11 Сонда ақыл-парасат сені аман сақтар,
Дұрыс түсінік те лайым бақылап қорғар.
12 Бұл сені құтқарып алар теріс жолдан
Және жалғандық айтушының ықпалынан,
13 Тура жолдан тайып, түнекте жүргендерден,
14 Әрі жамандық жасағанға қуанатындардан,
Зұлымдықтың азғындығына шаттанатындардан,
15 Жүрген жолдары қисық, адасқан сол жандардан.
16 Даналық сені сақтар бұзылған әйелден,
Жеңіл жүрісті оның жағымпаз сөздерінен.
17 Ол жастайынан қосылған қосағынан бас тартқан,
Құдайының келісімін есінен шығарған,
18 Оның үйі өлім жолына түсірер,
Соқпақтары о дүниеге жетелер.
19 Оған барған пенделер қайтып келмес,
Шынайы өмір жолына енді түспес.
20 Сондықтан жүр ізгілердің ізіменен,
Лайым жүр әділдердің жолыменен!
21 Себебі әділдер елді мекендейді,
Кінәратсыздар сонда тұра береді.
22 Ал зұлымдар елден аластатылады,
Опасыздар түп-тамырымен құртылады.

Тәлім алып, Тәңірге мойынсұнудың зор пайдасы >>>