9. Даналықтың "тойға" шақыруы

1 Даналық өзінің үйін салған еді,
Оның жеті діңгегін қойған еді,
2 Енді сусынын даярлап, малын сойды,
Тамаша дастарқанын жайып қойды,
3 Адамдарға қызметшілерін жұмсады.
Енді Ол қаланың биігінен жар салады:
4 «Мұнда келіңдер!» деп шақырады
Бар аңғалдарды Һәм парықсыздарды:
5 «Кәне, келіп, дәм татыңдар асымнан,
Ішіңдер дайындаған сусынымнан!
6 Надандықты тастап, шынайы өмір сүріңдер,
Лайым ақыл-парасат жолымен жүріңдер!»
7 Мысқылшылға сөгіс берген масқара болар,
Зұлымға ескерткенге мін тағылар.
8 Мысқылшылға ескертпе, сені жек көрер,
Данаға ескерт, ол сені сүйер.
9 Данаға тәлім бер, даналығы өсер.
Әділді де үйрет, білімі өсер.
10 Даналықтың бастауы — Тәңір Иені
Терең қастерлеп, Оған мойынсұну,
Һәм ақыл-парасат — Киелі Құдайды
Және Оның еркін жақыннан тану.
11 Даналықпен көрер күнің көп болар,
Парасатпен жасыңа жас қосылар.
12 Дана болсаң, пайдасын өзің көрерсің.
Мысқылшыл болсаң, зиянын өзің шегерсің.

Надандықтың шақыруы

13 «Надан әйел» даурыға айқайлайды,
Өзі аңғал, мән-жайларды ұғынбайды.
14 Үйінің есік алдында орындыққа
Отырады ол, қаланың биік орнында.
15 Тура жолмен өтіп бара жатқандарға
«Надан әйел» дауыстап жар салуда:
16 «Мұнда келіңдер!» деп шақырады
Бар аңғалдарды Һәм парықсыздарды:
17 «Ұрлап ішкен су сондай тәтті екен!
Тығып жеген нан сондай дәмді екен!»
18 Адамдар білмейді бұрын шақырылғандардың
Өлік болып көр түбінде жатқандарын.

Әділ жанның дана сөзі мен ісі жайлы>>>