СҮЛЕЙМЕННІҢ ТАҢДАУЛЫ НАҚЫЛ СӨЗДЕРІНІҢ ЖИНАҒЫНАН

10. Әділ жанның дана сөзі мен ісі жайлы

 1Сүлейменнің бірсыпыра нақыл сөздері:^*

 

Ақылды бала — әкесінің сүйініші,

Ақылсыз бала — шешесінің күйініші.

 

 2Арам байлық пайдалы болмайды,

Ал әділдік ажалдан сақтайды.

 

 3Әділдің аш жүруіне Жаратқан жол бермес,

Зұлымның аңсағанын беруді қош көрмес.

 

 4Жалқау қол жарлы қылар,

Ісмер қол дәулетті қылар.

 

 5Жазда өнім жиған — ақылды бала,

Орақ кезінде ұйықтаған — арсыз бала.

 

 6Әділ жан жарылқауға ие болар,

Зұлымның аузы зорлығып жасырар.^*

 

 7Әділді есіне алған жұрт шүкір етер,

Ал зұлымның есімі құрып кетер.

 

 8Дана нұсқауларды ықыласпен қабылдар,

Надан өз сөзінен сүрініп құлар.

 

 9Таза жүрген аман жүрер,

Қисық жолдағы әшкереленер.

 

 10Көзін қысып белгі берген ыза келтірер,

Ал мылжың бос сөзінен жапа шегер.

 

 11Әділдің аузынан өмір қайнар,

Зұлымның аузы зорлығып жасырар.

 

 12Өшпенділік араздық туғызар,

Сүйіспеншілік бар күнәны жабар.^*

 

 13Зерделінің аузынан даналық шығар,

Парасаттан бас тартқан жазасын тартар.

 

 14Данышпан білімін сақтап қояр,

Ақымақ аузымен пәле шақырар.

 

 15Байдың қорғаны — өз байлығы,

Жарлының пәлесі — өз жоқшылығы.

 

 16Әділдің өнімі — өмірге,

Зұлымның табысы — күнәға.

 

 17Тәрбиеге мойынсұнған өмірге жол бастар,

Ескертуді елемеген өзгені де азғырар.^*

 

 18Қастығын жасырғанның тілі жалған,

Өсек-аяң таратқан — ақымақ жан.

 

 19Сөзуар құтыла алмас күнәдан,

Ақылды өз аузына ие болған.

 

 20Әділдің тілі — таңдаулы күміс,

Зұлымның ой-ниеті — түкке тұрғысыз.

 

 21Әділдің тілі көпке ақыл берер,

Наданның зердесіздігі түбіне жетер.

 

Тәңірді шын қастерлеу ғұмырды ұзартар

 

 22Жаратқанның жарылқауы адамды бай қылар,

Уайымыңнан қосымша пайда болмас.^*

 

 23Зердесізге зұлымдық ләззат,

Зерделіге даналық ләззат.

 

 24Арам жан қорыққанына тап болар,

Әділдің аңсағаны орындалар.

 

 25Құйын өтіп кетсе арамза ғайып болар,

Ал әділдің негізі мәңгі берік болар.

 

 26Қышқыл^* тіске түтін көзге кесел,

Жалқау өзін жұмсағанға кесел.

 

 27Тәңірді шын қастерлеу ғұмырды ұзартар,

Ал зұлымдардың ғұмыры қысқартылар.

 

 28Әділдің күткені шаттыққа апарар,

Зұлымның үміті бекерге болар.

 

 29Тәңір жолы мінсіз жанға қорған болар,

Ал зұлымдық істеушінің көзін құртар.

 

 30Әділ жан ешқашан шайқалмас,

Зұлым жан елінде тұра алмас.

 

 31Әділ даналықты шыңдай түсер,

Өтірікші лайық жазасын шегер.^*

 

 32Әділдің аузынан ізгі сөз шығар,

Арамзаның аузынан азғын сөз шығар.

Адалдық пен ізгілікті Жаратқан Ие ұнатар>>>