12. Жақсы тәрбие алған бақытты

 1Тәрбиесін ұнатқан — білімді де ұнатқан,

Ал ескертуді жек көрген — санасыз надан.

 

 2Ізгі жанды Жаратқан ұнатар,

Зымиянға Ол үкімін шығарар.

 

 3Адам зұлымдықпен аман болмас,

Ал әділдің негізі мызғымас.

 

 4Ізгі әйел күйеуінің абыройын асырар,

Арсыз әйел күйеуінің қуатын тауысар.^*

 

 5Әділдің ой-ниеті әділетті,

Арамзаның кеңесі алдамшы.

 

 6Зұлымның сөзі қан төгер тұзақ құрар,

Әділдің сөзі пәледен құтқарар.

 

 7Зұлым құлап, із-түзсіз жоқ болар,

Әділдің шаңырағы берік тұрар.

 

 8Ақылына қарап адамды мақтар,

Ойы бұзық жан жексұрын болар.

 

 9Кеуде көтеріп аш жүргеннен гөрі,

Адал еңбек еткен^* қарапайым жан игі.

 

 10Ізгі жан малының да қамын ойлар,

Арамзаның жүрегі қатыгез болар.

 

 11Жерін өңдегеннің қарны тоқ,

Бос қиял қуғанның ақылы жоқ.

 

 12Зұлымның олжасына сұрқия көз салар,

Тамыры берік әділ жан жемісті болар.

 

 Өтіріктің құйрығы бір-ақ тұтам

 

13Арамза жалған сөзінен ұсталар,

Әділ жан пәледен аман құтылар.

 

 14Аузынан шыққан жақсы сөзі адамды тоқ қылар,

Еңбек еткен қолы да ақысын алар.

 

 15Ақымақ жүрген жолым тура дер,

Саналы жан кеңеске құлақ түрер.

 

 16Ақымақтың ашуы бірден бетіне шығар,

Ақылды жан шеккен жәбіріне немқұрайды қарар.

 

 17Білген шындығын айтқан әділдікті паш етер,

Жалған куәгер опасыздық етер.

 

 18Мылжың тілімен семсердей шағар,

Дана тілімен жан жарасын^* сауықтырар.

 

 19Шыншылдың сөзі мәңгілік,

Өтірікшінің сөзі бір-ақ сәттік.

 

 20Зұлымдық ойлағанның жүрегі толған сұмдық,

Татулық ойлағанның жүрегі толған шаттық.

 

 21Әділге күнәның кесірі жұқпас,

Зұлым толған пәлесінен арылмас.^*

 

 22Жалған тіл Жаратқанға жиренішті,

Ақиқатты айтатын Оған сүйкімді.

 

 23Зерделі білімін жасырар,

Зердесіз надандығын жариялар.

 

Еңбекқордың меншігі құндана түсер

 

 24Еңбекқор қол билікке жеткізер,

Жалқау қол құлдыққа түсірер.

 

 25Сары уайым адамның еңсесін басар,

Жақсы сөз оның көңілін тасытар.

 

 26Әділ жан серіктерін ақ жолмен бастар,

Арамзаның жолы оларды адастырар.

 

 27Жалқау аң аулап, етін қуырудан ерінер,

Ал еңбекқордың меншігінің құны арта түсер.^*

 

 28Әділдік жолында шынайы өмір бар,

Онымен жүрген мәңгі өлімнен^* құтылар.

Данамен жолдас болған дана болар>>>