22. Ізгі атағың бағалы зор байлықтан 

 1Ізгі атағың бағалы зор байлықтан, 

Жақсы абыройың құнды күміс-алтыннан. 

 2Бай мен жарлының ортақ қасиеті: 

Екеуін де жаратқан Тәңір Иесі. 

 3Зерделі жан қатер көріп бас сауғалар, 

Аңғал адам жүре беріп, зиян табар. 

 4Тәңірді терең қастерлейтін кішіпейілдер 

Байлық, абырой, шын өмірге кенелер. 

 5Зымиянның жолы тікен мен торға толған, 

Өзіне сақ болған аулақ жүрсін содан. 

 6Баланы жастан салсаң тура жолға, 

Есейгенде ол содан таймайды да. 

 7Бай адам жарлыға үстемдік құрар, 

Қарыздар қарыз бергеннің құлы болар. 

 8Зұлымдық сепкен пәлені орар, 

ҚаҺарының сойылы сынып қалар. 

 9Жомарт жан жарлымен нанын бөлісер, 

Құдайдың жарылқауына кенелер.* 

 10Қорлаушыны қусаң, жанжалдан арыларсың, 

Ұрыс-керіс, балағаттан ада боларсың. 

 11Жүрек пәктігін жақтыратын, 

Ұнамды сөздерді айтатын 

Жанға патша да болар жақын. 

 12Жаратқан Ие білімге қырағы болар, 

Опасыздардың істерін Ол құлдыратар. 

 13«Далада арыстан бар, 

Алаңда көзімді құртар» 

Деп жалқау сылтау айтар. 

 14Азғын әйелдің сөздері — терең шыңырау, 

Тәңір жақтырмаған пенде соған құлар-ау. 

 15Баланың жүрегінде надандық бар, 

Тиянақты тәрбие* содан арылтар. 

 16Баюы үшін кедейге жәбір көрсететін 

Әрі байға сыйлықтар бере беретін 

Адам болады кедейленетін. 

ОТЫЗ ТАҢДАУЛЫ НАҚЫЛ СӨЗ 

 17Даналардың айтқандарын құлақ түріп тыңда, 

Бермек тәліміме зейініңді бағышта! 

 18Игі болар лайым оларды есіңде сақтасаң, 

Әрі аузыңнан да ешбір тастамасаң. 

 19Сенімің болсын деп Иемізде 

Осыны бүгін үйретемін дәл өзіңе. 

 20Саған ақыл-кеңес, тағылым беру үшін 

Мына отыз нақылды* жазғанмын, 

 21Ақиқат, адал сөздер үйренуің үшін, 

Өзіңді жібергенге дәл жауап беруің үшін: 

1 

 22Жарлыны жарлы деп тонама, 

Дау сотында бейшараны қыстама! 

 23Солардың мүдделерін Жаратқан қорғайды, 

Оларды тонағандардың өздерін тонайды. 

 24Ызақормен дос болма, 

Ашушаңмен байланыспа. 

 25Әйтпесе өзің соған еліктейсің, 

Тұзаққа түсіп, күйреп кетесің. 

3 

 26Қол алысып, бөтеннің қарызына 

Кепіл болатындай ақылсыз болма!* 

 27Болмағанда төлейтін ақшаң 

Төсегіңді тартып алар астыңнан. 

4 

 28Ата-бабаң салып кеткен межеңді 

Жасырын жылжытып, ұлғайтпа жеріңді. 

5 

 29Кездестірсең біреуді ісіне аса шебер, 

Жай адамдарға емес, патшаларға қызмет етер. 

Балам, жүрегіңді Маған бағышта>>>